الشاعر كاظم العطشان
تحلّى بالصبر عند قراءتها،
فالقصيدة جسد موحد من الدراما ،
لايقبل التجزأة رجاء …
طين الولاية مَرَّه گتلك
لاتتيه ابحضن غيري امحاضن الغربه چذب
ونته گتلي :
الشوگ شتله ايريد طين
وگتلك الغربه عذاب وطين الولايه عذب
ومره گتلي
غَنّي ياماي القصايد
غني ياشذر الگلايد
غني ياغَربي اليهِب
غَنّي بيّه… واثمل ابكاس الهلاهل
والهلاهل مُهره من تصْهِل تِشِب
ومره گتلي
الليل ورَّثني جگاره
وشتهيتك چاي هيل وخُبز سَمرَه
ونته تدري الحلم سفره
والعمر شَبَّت عِشِب
ومرّه گتلك
يانده اليحلف ابختك كل ورد ديرتنه ذاك
يانبي القدّاح …سولفلي شجاك …!
يمته تتبرزل وضوگك… يمته ياشيبة غلاك
ومنهد اوّل عرس صفگله نجمك
ومنهد آخر حلم طفّاه ضواك
ماكسر فَيّ البراري ولاورد فز ابنداك
ومره گتلي
ياشذر ..
ياهَيَه ….
ياكشخة الباشه
طشني بجروفك محاچي
الروج عتني وغرگن اسنيني عطاشه
وگتلي يافيْ التراچي
الظلمه باگت كل ضواي وروحي تتوسل فراشه
ومره گتلك
ياقفل شباچ حضره ….
الحِنّه يِبسَت والصواني ابلايَه بُرگع
والشمس شربت سماري ومالگيتك فَيْ ضريح
وچان بين الليل والمو ليل… إصبع
چان حته اهلالك امزاعل سمارك
واذكر الكاروك صدري
وچان بيك الصبر مرضع
ومره گتلك
حصدت الوادم حنين وانه بيّه الشوگ حال
لاشمس نثرت شعرهه… ولانفح ضيّ الهلال
وآخ ياچف الربيع الشتل بجروحي خضاره
وطاف بظنوني جوابه وعَسَّر ابشفتي السؤال
ومانشدتك…….. ليش ياتالي الدلال !!
ليش دمك عندي كعبه
ودمي عندك دم غزال ….!!
ومره گتلي ….. وستحيت
وخذني بيك الخوف لأحلام الرجيف
صللَّه بيّه….. وفَرني بيك أشواط سبعه
واشتراني اعلوم صيت
وباعني اعله العبره دمعه
وساوماني ابصم بخور
وشَبني بسطوح ال اگبور
المارضه ابحضن الصواني اعتلگ شمعه
ومره گتلي
ومره گتلك
ولتهينه …. وباگنه اتراب السوالف
وانتهينه …… وغرُّبت بينه السنين
الخطوه تتوچه اعله خطوه
وخايف ايهَدّي اعله خايف
وانه اصيحن :- ها.. ي يَبَعد اليوجْعَنَّي
التعب خذني
وچنها شو… شمرة عصه افياي الصرايف
وافترگنه…..وچان أوّل سفر شيب
وچان آخر طعم حنظل
وچان آخر بشر ذيب
وچان آخر…… مدري شنهي
وچان نوم الظن فزيز
وزرت روحي… وجدَّدت شبّاچ نيتي
واختلط ماي المطر ويَّه النزِيز
ومن صحينه..
لنهه وشلة كاس ظلّت
مدري ليش..
العمر من يصحه اعله وشله ايظل عزيز
و …
مدري ليش ايظل عزيز
