العراق ابخيت وابراسه الف شاره
شعر: عباس طريم
العراق ابخيت وبراسه الف شاره
والياذيه , لابد تنهجم
داره
من الفردوس , مخلوق النخيل البيه
ومن جنة عدن , مخلوقه
اشجاره
شجاع وشهم حر, ويشهد التاريخ
والاحرار واهل الغانمة
اخياره
شيعة وسنة والاكراد والتركيف
ويزيدية ومسيح وصابئة
انصاره
بغداده جميلة , وبصرته الفردوس
واربيلة مصيف, وجنة
انباره
اليكولون طاح ,وبيه ما ظل حيل
ذولة وداعتك ياخوي
عياره
جبل عالي اوعمره ابعمر هذا الكون
والتاريخ , هو الرفع
انواره
اذا ناده المنادي , الساحة الميدان
ركْضت للمناية ,ازغارة
واكباره
بْدمّه الكرم يجري , ويختلط بالروح
والديوان باقي وما طفت
ناره
اشجع من سبع ضاري , الضعيف البيه
واكرم من عدي , اوحاتم
اشراره
عميد ايظل , رغم كل المصاب البيه
لان ربك عميد العالم
اختاره
يظل راس العراق ابكل وكت مرفوع
ما دام الغياره البيه
ثواره
بلاد الخير , فاض وغرّك الجيران
كاعه اتجيب توم , اوتهطل
امطاره
ربك بارك اترابه وشتال البيه
وبارك كل مياهه , اوبارك
انهاره
يخوفون الاسد من هجمت الفيران
وهم شفتو اسود اتخاف من
فاره
العراق البيه حيدر, ما يمرّه الضيم
ما مونه تظل , رغم المحن
داره
والبيه شمعة الزهراء ابو الاحرار
حسين , البالضريح وينطي
خطّاره
والعباس بيه , وكاضي الحاجات
وال البيت ..ياهو اليوصل
اسواره
سيّدنه المعظّم بيه ,ابو الوكفات
يرجع باليريده واكثر ..
الزاره
وعبد القادر . الشيخ اليجوه ماشين
من أهل الهِنِد والصين
وامصاره
اقمار , وبنوا عبر العصور الدين
هله بعز العراق , وهله
باقماره
رجال.. اتعوّدوا جيش العده ايخلّوه
من بغداد , لليابان
طشّاره
ربك حامي هذا البلد من كل سوء
وسْماه البخيت ,وحطله الف
شاره
