وين الكه الصديج اللي يوافي
الشاعر عباس طريم
وين الكه الصديج اللي يوافي
والابيض حليبه , وحيل
صافي
+
واذا جافتني وكت الضيج, دنياي
يظل عالعهد ثابت , ما
يجافي
+
يصح بيه الشعر ..لوجبت طاريه
وتصدك بيه ..جميلات
القوافي
+
وين الله وبلا موعد , الاكيه
حته انجان .. مستفلس
اوحافي
+
الخلق ما ينشره , اوبفلوس ينباع
الخلق , لو وحده بالانسان
كافي
+
عوافي اعله اللكاله ابغربته انسان
الف مبروك , اي والله
وعوافي
+
الصديج ايداوي.. ويشافيك مرات
وصحيح الله ! بس هو
اليشافي
+
واذا الكلب احترك مرات,يطفيه
وما تحتاج اصلا
للمطافي
+
ادور اعليه ..عساني انجح ولاكيه
واذكره ابشعر , معروف
الرصافي
+
ادور بالازقه , وبالمحلات
ابساحات الملاعب
بالمرافي
+
وعله ابواب الطرق ,بين المسافات
وعله اطراف التباعد
بالمنافي
+
عساني الكه الرسمته ابكلبي اوصار
جزء من روحي, وحلمي
الدافي
+
حجيت اوي الزمن , واطيته انذار
وكلتله من الضحك عالذقن
كافي
+
دفعت ابعيد عن بيتك , الطيبين
وعندك كل زفر ممصوخ
لافي
+
خاويت النذل , والعيب مضيوف
وتركت المثله بين الناس
مافي
+
عكس ممشه النهر , زحت المجاذيف
ندور ابليل , والمصباح
طافي
+
شمالك يازمن , واتغيرت ليش
ودفعت الناس كلهم
للمنافي
+
تعبت امن العتب وياك , واللوم
ويبست من كثر حجيي
اشفافي
+
المستور انكشف, وانعرف مرماك
ما ظل سر الك , يازمن
خافي
+
خلصت العمر سايح , اورحال
ما يكفيك بالعالم
طوافي
+
ادفع بالجنط بين المطارات
ودومي اعله الظهر شادد
الحافي
+
انه اللي اتغربت , من دون اسباب
وابد ما جان وي احد
خلافي
+
رحلت ابطرك جنطه, وبدله وياي
المن وين ؟ ما اعرف
اهدافي
+
تعبت اهواي , من كثر المحطات
واخرهن, زيارات
المشافي
+
اعترفلك حمضتهه اهواي وياي
واريدك تسمع اليوم
اعترافي
+
حفظت ادروسك , اوتندهني كل يوم
حته استمع للدرس
الاضافي
+
جف ماي البجسمي وضعفت الروح
وظل ايزيد ما ينكص
جفافي
+
نحل مني الجسم , ما ظل بعد حيل
واحسهن ثكلن , وتعبن
اطرافي
+
خلص , عمري انتهه, وظلت وشالات
ونريد انعيشهه ابكل حال
كافي
+
نايم ..ما اريد اسمع بلاويك
رحمه الوالدك .. خليني
غافي
عباس طريم
