((وليـــــــــــــد ألكعبـــــــــــــه ))
تمنيتك تجي وتشيل الهموم
تلم اگزاز عمري اللي تطشر
وافك باب الگلب اهلا هلا بيك
وافرشلك رموش العين منـــدر
وابوس ايديك واجبينك ولجــدام
وامد روحي الك عالدرب معبر
واصلي اوياك شكراً كل الفروض
يمن وجهك دعاء ويطرد الشــر
وليد الكعبه انته وشانك الطيب
ومن اشرف سلاله ومنبعك در
ابن عم النبي سيد الاكوان
وبالزهراء بيتك ضوه وازهــــــر
اسمك يا علي بقاموس الاسلام
اول مرتبـــه وعالكون نـــــــــور
علي لوجيت جيب اوياك الاسلام
لان اسلامنه ابهاليوم منظـــــر
اسحب ذو الفقار وعاقب الشين
ورد صفين واقلع باب خيبـــــــر
يبو الحسنين منك ماكو اثنين
اذا ننخاك بالشدات تحضـــــــر
لعب بينه الوكت واتغيرت الناس
ابدم بارد صفت لرگاب تنحــر
يبو الحسنين وينك وكتي طاعون
كله اليابس ابدربه وي الاخضر
يبو الحسنين المن نشتكي الحال
ابهمنه ينترس كل يوم دفتـــــر .
