متى يرتاح العراق
عباس طريم
_
العراق وي الزمن خلصهه لوعات
من يوم انولد ادم
اوحوه
اكل لمن تعب عالراس طكات
وكلهه اتصيح , هذه الابي
اشسوه
ما يعرف ابد , معنه المسرات
مثل طفل الفقد , معنه
الابوه
العراقي اليوم , من كثر المعاناة
ما يعرف صديقه , من
عدوه
ما ينعرف , من يمك اذا فات
جنه اعله النعش , محمول
توه
محني الظهر, ها ها وكع ها مات
تعبان , و يشيل الجدم
كوه
مثل واحد غريب , وعثر بموات
وشرد , والناس كله اتصيح
هوه
حياته ابكل بلاد الله , مأساة
وحظه مصخم , باي ارض
نوه
الدنية اتصيح , مو صاحب حضارات
مو هو البنه , وعمر
وضوه
عجيبة , شصار بعقول القيادات
التنصح بالتلاحم ,
والاخوه
شعب مسلم , ومهبط للديانات
ويؤمن بالاله ,
وبالنبوه
مبعثر بالدول, بس عالاعانات
عايش بالحياة , اتكول
كوه
شاف الويل من كل الحكومات
وبنيرانهه الحمره ,
تجوه
ما فد يوم , طالب بالوزارات
ولا زل وحجه ابشينه ,
وتفوه
وبغير العراق الطيب الذات
ابد هذا المحارب , ما
تقوه
اله بكل الدول اسمه اعتبارات
عراق , وتنحني الكل
السموه
سيف مجرب , ويرفع الهامات
ورب الكائنات , انطاه
قوه
يسمونه الابي , وكاضي الحاجات
كريم , وحين يعطي
ما يتروه
وارضه , الله حط بيهه الكرامات
لكل زاير تحت جدمه
اتطوه
لان بيهه الايمة , اهل المنارات
ال البيت . اصحاب
المروه
وبي , نهر الفرات اليجري خيرات
وعله طول الزمن اجيال
روه
عراق, وشامخ ابكل القياسات
فوك , وكل عباد الله
جوه
