الى اعمامي السواعد اهل العز والكرم في ارض العراق اهدي قصيدتي
الشاعر : عباس طريم
جدي من القدم .. يسكن الهدام
ورزقه البلم , والساعد وفاله
يجي امن الهور ناطر ..ابد مينام
سمج وطيور , متلتل اشواله
يزرع كل وكت.. متحزم احزام
ويحيطون بي .. ربعه ورجاله
عمامي اوياه .. يامحلاهم ازلام
يزرعون , ويسرحون ابحلاله
تلكاهم نهار الكيظ , صيام
واحدهم .. ولا جن تعب ناله
جانوا مو زلم .. للحجي خدام
يشيلونه .. ويحملونه احماله
يكعد .. فوك راسه اترف العلام
السواعد عن يمينه , وعن شماله
جدي ايداوي الكل.. يحجم احجام
وما صعبت عليه فد يوم , حاله
ميصدكون .. طب اليشفي السقام
ويصدكون .. كل الجدي كاله
وجدتنه بقدرهه , وكايمه اكوام
تخبز .. كل رغيف الطاح شاله
طفل .. ويحاول ايقلدونه العيال
وكل رغيف يطلع , شبل شاله
طين ابيوتهم , وتحيطهه اخيام
وكل ضوياتهم , بالبيت لاله
والشباج طين وخشب , موجام
بجنوبه الهوه يرفرف , وبشماله
جبير البيت , ومقسمينه اقسام
وكل واحد .. اوي اعياله وجهاله
تعثر بالدجاج اليمشي , الاقدام
بيضه ابكل كتر.. يتعب نكاله
الحلال ايبات طرف البيت , وينام
هوش وغنم , حال الربع حاله
وما تحتاج تسمع عود , ودرام
الصبا شغال , واللامي اكباله
علفهم للحلال , اكوام باكوام
جت وخبز , ومطعم انخاله
اكلهم .. سمج , طابك , كل الايام
وحليب وبيض , كل واحد اكباله
الصبح سياح حار, ابوسط الاحرام
وجبن صنع الاهل , مو من وكاله
اشجار اوزرع , ابدع العلام
ومي النهر صافي , يا زلاله
يصلح للشرب , ويصير حمام
اذا طبيت .. كل التعب زاله
يوميه اعله شاطيهم , البلام
يجي محمل , بانواع البقاله
كل شي ابكاعهم اصلي, وبعد خام
حياة الريف , تعرف بالاصاله
طبيعه الشاف روعته وحضر , هام
ودفع لعيونه الحلوات , ماله
مثل اي ناس .. جانوا عدهم احلام
واسم محد وصل عتبته , وطاله
حلو ديوانهم , خلوه جدام
وابد ما تنطفي , ناره ودلاله
اوكت الليل , تلتم كل الاعمام
واحدهم سليم , وخالي باله
واحدهم هني , ومرتاح ما دام
كهوة وجاي , ومعدل اعكاله
حلو الديوان .. بيه الخاص والعام
وكل واحد .. ايكول اليجي اباله
سوالف عالملوك .. وعلى الظلام
وجاي وكهوة دك , حد الثماله
التتن , تشتمه ونته بديرة الشام
والفنجان , يتنقل ابحاله
وسوالف حلوة ..عن فارس اومقدام
بطل , ويثور من اجل العداله
سوالفهم .. دوه اتخفف الالام
وقصصهم .. تمطر اخلاق و نباله
يحبون القصص .. عن ذكر الاعلام
ويكرهون .. افعال الحثاله
واحدهم يجي .. ابكل لهفه محتام
يسمع ابو زيد , وحر فعاله
اجاويد .. واهل وكفات واكرام
الكصدهم .. ما يردونه محاله
الحرامي ايشيل منهم .. يرحل الزام
عمامه اترفضه , وترفضه خواله
الشرف عدهم, ايكمل روح الاسلام
وعدهم كل عفن .. يحتاج ازاله
امان وعز عليهم , خيم ودام
وصفاء اكلوب , ما شفنه مثاله
على الجاي المهيل , تمر ايام
وزمن تطويه , عالماشي رماله
ونتذكر رجال .. اتفيض اقدام
مو احزاب , بس عدهم رساله
جذب ما عدهم , وما عدهم افلام
واحدهم .. مثل ليلو خصاله
سلم قاموسهم .. من جلمة اجرام
وصحيفتهم .. خلت من كل نذاله
واحدهم نضيف الداخل .. اوخام
دغش ما بيه , يخجل من خياله
يظل الوطن غالي , ويبقه جدام
متقدم عليه .. وعله اعياله
الوطن عدهم , امين وعيب ينظام
ويقدسونه .. بعد رب الجلاله
اذا ناده الوطن وين زلم .. كام
واحدهم جفن شال ..و مشاله
زمن راح , ومضت عالدنية اعوام
وبعدنه اليوم .. نتذكر رجاله
ياحيف الوجوه , اليوم من جام
اجوه .. اوشوهو رسمه وجماله
طوقنه المرض , وانتشرت اورام
والصاحي انعده .. وساءت احواله
وما ندري السبب.. يم سام يم حام
الينشد حار , بافكاره وسؤاله
ياهو المرمي منه , وياهو الرام
وياهو اللي لحس , حته الوشاله
وياهو السرفن , وسموه لكام
وحته اللي بقه من الزاد , شاله
ياهوالاكل حصته ..وحصت الاعمام
وانكشفت الكل عاقل , خصاله
الخصال الطيبة ..صارت شبه اوهام
اوطنه للاسف , محد ابحاله
الصحف .. دكت للمعزبين دمام
نشامه .. وفرهدوا رسمه وخياله
صدك مفتوحة , ما مسدودة الاكمام
بس كل واحد , امفتح وكاله
انباعت وانشرت مولاي .. الاقلام
واتحدد بعد .. سعر المقاله
وليلح ابسؤاله حيل , ينلام
ويتهمونه .. الحراميه ابعماله
[ الشاعر : عباس طريم ]
