قصيده للشاعر فالح حسون الدراجي
انه وياك وصفنتي واخر الليل
انه وياك وصفنتي واخر الليل
نتحاسب عالسهر والهم والذنوب
ومثل اخر جكارة باخر الليل
نفس نفسين روحي وبيدك تذوب
اكعد من عليك باخر الليل
اذا تبجي الشمس لو طاح الغروب
وافززمن عليك بهدة الليل
اذا من غير فزة الكون مرعوب
واصحي من عليك بوحشة الليل
اذا حتى النفس جحّل بالكلوب
واحشم من عليك بعضة الليل
اذا كلشي بزمانك صار مجلوب
شسوي شبيدي شكدر كلي ياليل
اذا حتى الزلال بأيدي يروب
اشو عنتر زماني يصير يا ليل
عليه وعالشديد يصير شيبوب
انا مناكت كصب ومواكح السيل
وعلى مجافت زماني رويحتي تذوب
يركضني زماني بمركض الخيل
وبعد ما اطيح يسأل: خو ممتعوب؟
اذا غالب يردني باخر الخيل
واذا مغلوب شحجي وانه مغلوب
يجويني الزمان بماشة الليل
ويناشدني بصلافة اتوب؟ ما اتوب
انه شسويت حتى نتوب ياليل
شو ارغب ملاحة وطبعي محبوب
واذا ذنبي السهر معذور ياليل
@لأن بس الدجاج ينام الغروب
واذا ذنبي الشعر محسوب يا ليل
الشعر من الولادة بكصتي مكتوب
ثكل هم القصايد يهدم الحيل
وعساه بقلم شاعر حاسدي يلوب
واذا ذنبي الشرب محسوب ياليل
@اكولن أي نعم اثام وذنوب
لجن شربي نبيذ الشمس ياليل
وهم تحسب عصير الشمس مشروب
انه شعندي رصيد؟ وشتدري ياليل
.رصيدي من المحبة مترس جيوب
انه لساني العفيف منكع بهيل
وانه الطيرة التنام بفي الحبوب
وانه العود الرقيق ال بلهوى يميل
اذا اسمع قصيدة رويحتي تذوب
جاراتي خواتي وحامي دخيل
ما وصخت نفسي وشلت مذبوب
والبيت الاطبه يصير ياليل
مثل جامع اقدسه ودوم مهيوب
ومثل كلبي هذني شفافي ياليل
وقالب للشرف من عندي مصبوب
وهذن ايدي علي شهود ياليل
ما جسمن جسم غالب لمغلوب
ولا اريدن جدح عطشان يا ليل
رغم عمري كضيته دوم منهوب
اعاند؟صح اجادل؟صدك ياليل @
واذا رادت صبر تلكاني ايوب
لجن هذا الوكت جالذيب ياليل
@اذا تسكت عليه تعيش مسلوب
وحلاتك بالرجل جاكوج يا ليل
ولا يكضي العمر سندان مكلوب
العمر يكضي العمر ويروح يا ليل
ويظل اسمي شريف بكل الدروب
انه بكلبي شعاع ايمان ياليل
@وكل نبضة بوريدي تمسح ذنوب
واذا انخه علينه بيوم ياليل
تخرس المنايا وتنجلي النوب
واذا ضكت عليه الباب يا ليل
دمعة عله الحسين تفلش البوب
